ايه  الزحمة دي … ياااااااااااااه كل دي عربيات ملاكي بسم الله ما شاء الله طيب ليه الناس في البلد  دي بتشتكي من الفقر وتقول عايزين عيش مدعوم من ابو شلن ؟؟

 بالزمة مش حاجة تحير برضوا لما تعرفوا ان عدد العربيات المرسيدس في مصر اكتر من عدد العربيات المرسيدس اللي في المانيا ايه الحلاوة دي ؟

طيب الناس عايزة ايه تاني ؟؟

اه نسيت اقول المشكلة ان الناس عايزة شوارع عشان تمشي فيها وتروح شغلها وهي مرتاحة لكن هي الناس حتروح شغلها ليه ما هو ما فيش حد لاقي شغل وحتي اللي لاقي شغل بيروح الشغل ينام ويعكنن علي خلق الله صح والا انا بابالغ شوية ؟

يمكن اكون انا مبالغ شوي ؟ لا انا باين علي مبالغ شوي والا اقولكم انا فعلا مبالغ شوية

طيب نتكلم جد شوية

كل واحد فينا يحسبها مع نفسه بتاخد كام وقت كل يوم عشان تروح الشغل بتاع حضرتك؟

خلي بالكوا انا قلت نحسبها وقت مش فلوس لا سمح الله احسن تقولوا علي انسان مادي وانا عمري ما كنت كدا

المهم تعالوا نشوف

انا مثلا كل يوم باتنيل اركب من فيصل لغاية المهندسين يعني مش المهندسين أوي قول مثلا لغاية كوبري الخشب او بولاق او الدقي او ارض اللوا كلها حاجات قريبة من بعضها صح وقريبة من فيصل يعني حسب ما يرضي ربنا المفروض تاخد 20 دقيقة

لكن انا باخد كل يوم ساعة ونص ….يا نهار اسود اه والله عشان تركب من فيصل لغاية ارض اللوا او الدقي ولو مش مصدقني جرب بنفسك يااااااااااااااه كل يوم ساعة ونص رايح وساعة ونص جاي يا نهار مكعبش 3 ساعات كل يوم في المواصلات طيب خلينا نحسبها وكل واحد ياخد باله من عقله

في الاسبوع الواحد بنضيع 18 ساعة في المواصلات

في الشهر الواحد بنضيع 72 سا عة في الموصلات

في السنة الواحدة بنضيع  864 ساعة في المواصلات

يعني 36 يوم في السنة حضرتك بتقضيهم في المواصلات

طيب لو انت عمرك الوظيفي 20 سنة مثلا علي اعتبار انك بتتوظف وانت عندك 40 سنة وتخرج معاش علي 60 سنة زي القانون ما بيقول

حضرتك بتقضي  720 يوم في المواصلات من عمرك الوظيفي يا خبر مش باين له لون يعني حضرتك بتضيع من عمرك 720 يوم عشان تروح الشغل يعني كدا لو قلنا بالسنة بالظبط بالظبط حضرتك بتقضي  سنة و355 يوم في المواصلات تخيل حجم الكارثة اللي احنا عايشينها

مع انها المفروض تاخد 160 يوم بس يعني 20 دقيقة رايح و20 دقيقة جاي في 6 ايام كل اسبوع  احسبوها كدا وشوفوا الفرق

يا

خفي الالطاف نجنا مما نخاف

انا قررت احجز مكان في مستشفي المجانين قبل ما الاماكن تخلص